أشاد المنتج طارق الجنايني، بمسلسل ” سوتس بالعربي” الذي هو من إنتاجه.
وذلك من خلال منشور له عبر موقع التواصل الاجتماعي”فيس بوك”، قائلا :” مع انتهاء الحلقة الرابعة من سوتس بالعربي”.
“الحمدلله في منتهى السعادة بردود الفعل المحبة للمسلسل”.
مقدمة المنشور
وتابع ” طارق الجنايني” :” عندي كام نقطة كدة كنت عايز أوضحهم من أول ما أعلنت عن تصوير سوتس بالعربي، بس كنت خايف تتفهم غلط”.
وأكمل :” بس النهاردة بعد ما الحمدلله المسلسل أثبت نجاحه و الناس بتشيد بيه في العالم العربي كله، أقدر بقى أوضح براحتي”.
أسباب إنتاج ” سوتس بالعربي”
ووضح الجنايني الأسباب التي أوضح من خلاله سبب إنتاج هذا المسلسل وهو :” صناع سوتس بالعربي من عشاق النسخة الأمريكي.
اللي على فكرة تكلفة الحلقة الواحدة منها بأكثر من تكلفة ال٣٠ حلقة عندنا.
و كلنا فاهمين من الأول أنك تعمل adaptation لمسلسل معروف و محبوب زي سوتس مش هتكون خطوة سهلة خالص
و الـdie hard fans اللي إحنا أصلاً منهم مش هيتقبلوها بسهولة”.
” اللي أتفرج على سوتس الأمريكي في العالم العربي ما بين مليون لأثنين مليون بالكثير.
بس العالم العربي حوالي ٣٥٠ مليون، يعني في ٣٤٨ مليون عربي ماتفرجوش على النسخة الأمريكي لسبب أو لأخر
ودول الحمدلله معظم اللي أتفرج منهم على النسخة العربي معجبين جداً بكل تفاصيل المسلسل”.
“علشان أنت شاري فورمات و دافع فلوسه ومعاك حقوقه، فهما كمان عندهم حقوق أنك ماتبوظش شغلهم و تفتي من دماغك.
علشان كدة لازم يكون تغييرات السيناريو في أضيق الحدود و بموافقتهم، بما فيها الأسم اللي بيعامل معاملة البراند”.
و ده اللي حصل مع الأمريكان نفسهم لما أشتروا حقوق the office مثلاً من أنجلترا و أمثلة تانية كتيرة في التليفزيون و السينما..
” الناس اللي بتتعامل على أن هارڤي و مايك و دونا و لويس و چسيكا و راتشيل ولاد خالتهم أو من الرسل اللي حرام يجسدوا على الشاشات العربية.
أحب أوضحلهم أن الcreators بتوع سوتس الأمريكي منبهرين باللي إحنا عاملينه و حابين الكاست بتاعنا جدااا و شايفين أن ديكورنا و صورتنا أحلى من بتاعتهم و ده عندي في إيميل موثق منهم”.
“من الطبيعي أنك تتفرج على الحلقة الأولى و تحس أن المسلسل ده مش ليك فا تعبر عن رأيك
و ده حقك تماماً بس غريبة شوية أن حضرتك لسة بتتفرج لغاية الحلقة الرابعة علشان تكتب بعد كل حلقة أن الأمريكي أحلى برضه.
أنا حاسس أنك أتعودت علينا بس خايف تعترف”.
“الأهم بقى من كل اللي فات ده و السبب الرئيسي لكتابة البوست ده، أن بعد مشاهدتهم لأول ١٠ حلقات.
تم الأتفاق مع NBCU أن النسخة العربية من سوتس دلوقتي داخلة الكتالوج الرسمي بتاع NBCU و هتبتدي تتوزع للعالم كله من شهر سبتمبر “.
ختام أقوال الجنايني
وختم قائلا :”أنت فاهم الفخر اللي إحنا فيه أن لأول مرة مسلسل عربي هيتم توزيعه من شركة زي NBCU؟
أنت فاهم ده قد ايه مهم و مفيد لمصر؟
الخطوة دي بقى النسبة ليا أنا شخصياً تكفيني لسنين قدام”.
ما هو ” سوتس بالعربي”؟
ومسلسل ” سوتس بالعربي” مقبس من المسلسل الأمريكي الشهير “suits” سيناريو وحوار محمد حفظي وياسر عبد المجيد، وإخراج مريم أحمدي.
ومن بطولة آسر ياسين، أحمد داود، ريم مصطفى، صبا مبارك، تارا عماد، محمد شاهين.
