كتب :محمد عبد المجيد
ظهرت النجمة” وفاء عامر” ضيفة فى برنامج الستات المذاع عبر فضائية النهار وصرحت بالعديد من التصريحات الجريئة عن الفن والحياة وإليكم نص التصريحات:
– قمت بجهد كبير في جزيرة غمام.. قلبي كان بيقع خلال التصوير من الخوف.
– أؤمن بالحسد وأخاف منه وأقوم بطقوس ضده.
– مش باخد أجر كبير وأكره رائحة الفلوس ودايمًا بعتبر إنها جت عشان تتصرف.
– الرسالة التي يحملها الإنسان ومنوط بتوصيلها أهم من كل الأموال والأدوار، ووالدي كان يقول: فلوس الحمار يتمرجح بيها القرد.
– صاحبي زوجك وخليه يصارحك، واللي يوجعني عدم التقدير واللا مبالاة، ولكن يجب أن نستوعب بعضنا في ظل الظروف القائمة الآن.
– زوجي ميقدرش يتزوج عليا، عشان أنا بعرف ألعب طاولة وشطرنج، واتعلمتهم مخصوص عشان كان بيلعب مع صحباته.
– زوجي مش بيجيب كباية من المطبخ وبأكله في بقه ومش عيب أغسل رجله في مياه وملح.. وفيه ستات أطيب من الرجال، وفيه رجال أطيب من الستات.
– لو راجل راح قال لمراته أنا عايز أتجوز.. تقوله إتجوز، لأن حتى لو كانت مكسورة ومبينتش وأظهرت أنها قوية هيرجعلها تاني .. وتوافق ترجع تاني ليه.
– لو الراجل بص لغير مراته، يبقى العيب فيها هي، فبعد سن معين الست بيحصل عندها تغيرات كتير في حياتها، لازم الست تراقب نفسها في شكلها ولبسها، وكل ما نكبر لازم نكون في حالة تطور مستمر ونبقى في مراحل جمالية أحلى.
– احنا مشاعرنا كستات بتشيخ مبكرا وبسرعة، إن لم تعمل دائما لهذه المشاعر مكياج.
– مش بشجع جوزي أو جوز صاحبتي إنه يخون.. لأ، ده مرفوض، وأنا من أنصار أن البيوت تظل مستورة بورقة الجواز والمشاعر والمودة والرحمة اللي ربنا أمرنا بها.
– أنا أعرف واحدة صديقتى لبست أحمر يوم عزاء زوجها وده علشان هى كانت بتحبوا أوى، وفجأة عرفت إنوا كان متجوز عليها ولما روحنا نعزيها لاقيناها طلبت تلبس جاكيت أحمر وإلا مكتش هتحضر العزا.
– أنا موافقه على الطلاق لما يكون الزوج بخيل، ولما يكون كسيب ومش بيقول لمراته هو معاه قد إيه وحارم مراتو وبيتو من وجود طاقة إيجابية مع أولاده، وكمان لما بيكون فى حاجة ممكن تأثر على أخلاقيات أولاده.. ممكن يكون بشرب أو بيعمل حاجات كتير مش صح وهو مش مثل أعلى لأولاده.
