سهير جودة: تعليم الاجيال الجديدة معنى نصر اكتوبر فرض عين وليس كفاية
كتبت :سهام صلاح
أعربت الإعلامية سهير جودة عن سعادتها بحلول ذكرى حرب أكتوبر المجيدة، الذي إنتصر فيها الجيش المصري على قوات الإحتلال الإسرائيلي، قائلة: روح أكتوبر هي اللي المفروض تبقى معانا كلنا على كل المستويات، والفن كان معبر صادق عن الروح دي، لكن طول الوقت إحنا محتاجين إننا نسعيد روح أكتوبر.
وقالت سهير خلال برنامج الستات المذاع عبر فضائية النهار، إنها تنتظر يوم ذكرى نصر أكتوبر غدًا عن طريق الإذاعة، مشيرة: هستنى بكرة الاذاعة، وأغنية بسم الله الله أكبر دي من الحاجات اللي بتديني طاقة، بحب إسمعها، لو سمعتها مليون مرة هفضل مستمتعة وسعيدة، عبرنا الهزيمة يا مصر يا عظيمة، صوت شادية الرائع، الحان بليغ حمدي.
وأضافت سهير جودة: صوت وردة في أغنية وأنا على الربابة بغني، الأغنية دي إتعملت في ساعات، فالفن كان قد ايه حاجة حقيقية وصادقة ومعبرة، فالموسيقى والألحان والكلمات والروح حاجة تانية، الزمن بيفرق.
وأشارت: لازم نبتدي نعلم الأجيال الجديدة يعني إيه نصر أكتوبر، المدرسين في المدرسة والأهل لازم يتكلموا معاهم عن نصر أكتوبر، ده فرض عين على الجميع مش فرض كفاية، ولازم الأجيال الجديدة يبقى عندها عزة وفخر بنصر أكتوبر، وليه لازم نستحضر روح أكتوبر دايمًا، ده واجب على كل الأباء والمعلمين.
وأضافت:” خلوا الولاد يخاصموا المهرجانات، أو أي نوع تاني من الأغاني اللي بيسمعوها، وكل التحية لأنواع الموسيقى المختلفة، لكن يوم نصر أكتوبر مختلف، وسمعوهم الأغاني الوطنية، شوفوا قد إيه كان عندنا ناس عظماء في الموسيقى، وسعيدة بتكريم علي إسماعيل في الدورة 31 من مهرجان الموسيقى العربية، ولازم نفخر بأننا عندنا إسم زيه في مصر، دي فرصة هما هيستمتعوا بجد بالنوع ده من الموسيقى اللي فيها حماس وحب”.
