تامر فرج يوجه رسالة للمنتجين والمخرجين

كتبت مريم عوض

أعرب الفنان “تامر فرج” عن إستيائه الشديد من قلة مشاركته في الأعمال الفنية سواء الدراما أو السينما،

ولذلك شارك “تامر” جمهوره بمنشورًا عبر حسابه الشخصي “فيسبوك” وعلق قائلًا: “البوست ده مش حالة إكتئاب

ولا يأس ولا إنهزامية خالص!! هو مجموعة أسئلة أرجو إنها توصل للقائمين على صناعة الدراما

والسينما والفن في البلد وبره البلد وحد يتكرم مشكورًا بالرد عليها”.

وأوضح: “الحمد لله الناس كلها بتقول لي أن أنا موهوب وعندي كاريزما، ومش عارف إيه وبيحيوني على أدائي وتمثيلي

وشواهد كتير بتقول إني بعرف أمثل.. واللي يقهر السؤال اللي مش عارف ليه يتوجه لي أنا لما بيقولوا لي إنت ليه مقل في أعمالك؟؟

ده إحنا بننتظر مشاهدك وشغلك.. أو إنت ليه ما بتعملش سينما؟؟.. أو إنت إزاي مابتاخدش مساحات أكبر من كده؟؟..

زي ما يكون أنا اللي مابشتغلش بمزاجي.. والأسئلة اللي بطرحها للمنتجين والمخرجين.

وأشار: أنا إسمي “تامر فرج” ممثل وسيناريست.. هل ممكن أمثل أو أكتب عشان أنا موهوب فقط مش عشان عندي عدد فولورز كتير

على السوشيال ميديا؟؟؟.. هل ممكن أمثل أو أكتب بموهبتي وأنا راجل مابحبش أتنطط في خروجات وكافيهات

وسهرات وتجمعات وبفضل إني أقعد فى بيتي مع أسرتي أكتب وأشتغل على نفسي في التمثيل؟؟..

هل ممكن أمثل أو أكتب بموهبتي من غير ما أتلزق في مهرجانات وحفلات لإني مابحبش أروح أي حدث فني

غير لما أكون معزوم بجد ومرغوب في وجودي ؟؟؟.. هل ممكن أمثل أو أكتب بموهبتي من غير ما أقعد أستعض نفسي وصوري

على الإنستجرام وأكتب صباح الخير وجمعة مباركة وإيه رأيكم في اللوك الجديد

أو أفضل أسوق نفسي بصوري في الجيم وأنا أتصبب عرقًا وأفرز عضلات من كل حتة في جسمي؟؟؟.”

رسالة تامر فرج للمخرجين

وإختتم: الحل الوحيد للتواجد عشان المنتجين والمخرجين يفتكروني، لكن أنا للأسف ماتربيتش كده وإتربيت على إحترام أهل بيتي

وإني أشتغل بموهبتي مش بتواجدي وخلاص، ويوم ما هستخدم السوشيال ميديا هستخدمها لنشر الوعي وتقديم محتوى

مش عشان أسوق لنفسي، هل ممكن أتعرف بشغلي ولا لازم أتعرف بالسوشيال ميديا؟؟؟..

هل ممكن أمثل أو أكتب بموهبتي مش عشان أنا من شلة فلان أو صاحب فلان؟؟؟

مع العلم أن الوسط كله أصحابي لكن أنا مبعرفش أفضل أبعت للمخرج فلان والمنتج علان تحياتي وسلاماتي

وبوستات عيدكم مبارك وصباح الرضا، ومع العلم أن أخويا المخرج العبقري أستاذ وائل فرج،

ومع ذلك مابيقدرش يجيبني في أعماله أحيانًا لأن جهة الإنتاج مش موافقة!!!..مش عايز ردود تعاطف،

واللي عايز فعلًا يساعدني يساعد أن البوست ده يوصل أو يمنشن حد من الوسط يكون عنده إجابات.. ولا نعتزل ونشوف حاجة تانية؟.