كتبت: هدير طارق
حلت الفنانه زينة ضيفه في برنامج صاحبة السعادة على قناة DMC، الذي تقدمه إسعاد يونس، وحكت عن تفاصيل مشاركتها في مسلسل “حضرة المتهم أبي” وكيف رفض الفنان الراحل نور الشريف مشاركتها في البداية وما الذي جعله يوافق عليها فيما بعد.
قالت زينة ” عن “حضره المتهم أبي” رشحتني المخرجة الكبيرة رباب حسين ربنا يعطيها الصحة، جت بعدها بيومين قالتلي نور مش موافق عليكي خالص، وقال بقى زينة اللي بتلبس (سينيهات) هتعمل الدور ده، قلتلها على فكرة بيمثل وحش، قالتلي إيه؟ قلتلها انا مش من جمهوره على فكرة”.
وتابعت “قالتلي هقنعه، قلتلها ليه ده أنا جامدة أوي المفروض يفرح، كنت عيلة صغيرة ومش فاهمة حاجة واللي يضايقها تغلط فيه، أنا جوايا عارفة كويس جدًا مين أستاذ نور لكن عايزه أبين من برة أنه عادي عشان كرامتي”.
وأضافت زينة “قالتلي إستني فيه بروفة ترابيزة، قلتلها أنا أجمد من إني أعمل بروفة ترابيزة، وراحت قالتله كده ساعتها وغير رأيه وقال هي اللي هتعمل الدور عايز يجيبني ليه عشان يسفلتني بقى، دي بت لسانها طويل ومجنونة ولا ايه”
وتابعت زينة أن بمجرد دخولها الأستوديو وجدت الفنان نور الشريف أمامها مرتديا جلباب الشخصية التي يقدمها بالعمل وجرت من أمامه وأخذت تبكي، موضحة “حسيت إنه كبير أوي وأكبر من المكان وضخم وعيطت وطلعت أجري وجري ورايا، قلتله أنا آسفة متزعلش مني مش هقدر اشتغل معاك، قالي لأ إنتي كويسة لو مكنتيش خوفتي كنت همشيكي وأنا قصدت أخوفك”.
و يذكر أن آخر أعمال الفنانة زينة، مسلسل “الليلة واللي فيها” من الأعمال القوية التي حققت ردود فعل قوية عند الجمهور ويشارك في بطولته بجانب النجمة زينة كل من محمد شاهين، مطرب الراب أبيوسف، سماح أنور، علاء مرسي، آلاء سنان، بكري خالد، وليد حامد، شيما الشريف وعدد آخر من الفنانين الشباب، تأليف محمد رجاء، وإخراج هاني خليفة.
