تامر عبد المنعم: بشوف نفسي إعلامي ناجح لأني كنت بقول الحقيقة.. والمذيع لازم يكون في صف المواطن

كتبت:نسرين أشرف البلاسي 

تحدث الفنان والإعلامي تامر عبد المنعم، عن فترة عمله كمذيع وسبب رحيله من قناة المحور، مُشيرًا إلى أنه يتمنى العودة من جديد للإعلام، ومؤكدًا أنه سيعود لقول الحقيقة كما اعتاد الجمهور.

وقال تامر عبد المنعم، خلال حواره مع الإعلامية أميرة بدر في برنامج VIP المذاع عبر شاشة قناة هي: بشوف نفسي مذيع ناجح لأني كنت مؤثر وكنت بقول كلام غيري مقالوهوش، كنت بقول الحق سنة 2011، قُلت خونة ومحدش صدق وطلعوا خونة، وغيري عام مع الموجة وأنا وقفت ضد الموجة، و98% من اللي كانوا بيطلعوا في التلفزيون عاموا مع الموجة وفي منهم كان شريك في الموجة، ودلوقتي غيروا كلامهم ولسة هيغيروا الكلام والأيام بيننا.

وعن سبب رحيله عن قناة المحور، فقال: مكنتش مرتاح في التعامل مع قناة المحور، وحسن راتب حاليًا مش عارف يرد عليا فمقدرش أتكلم عليه وربنا يفك أزمته ويرجع بيته سالم غانم.

وتابع: مكنتش مرتاح مهنيًا في قناة المحور لأن كان في تدخلات وتوصيات كتير ومكنتش مرتاح وأنا معرفش أعمل حاجة غير وأنا مرتاح حتى لو هعملها ببلاش، وكان في مجاملات كتير لهن ويُقال عنهم جنس لطيف ولكن هل هن فعلًا جنس لطيف؟ ولو كان جنس لطيف مكنتش مشيت.

وأضاف تامر عبد المنعم: في مذيعات كتير على الشاشة مكنش ينفع يطلعوا، وكان في تكتيفات كتير وأنا بحب أكون بحريتي، وكمان كان في اتفاق مع قناة العاصمة كنا بنطلع بالتجربة بتاعتها وكنت مرتاح فيها أكتر.

ورد تامر عبد المنعم على حديث الإعلامية أميرة بدر، والتي قالت: الناس كانت بتشوفك مذيع دمك تقيل؟، قائلًا: أنا مكنتش طالع أضحكك أنا كنت طالع أقولك الحقيقة، وفي بعض الإعلاميين والإعلاميات بيطلعوا جهلة ومبيعرفوش يقولوا كلمتين على بعض.

وأعرب تامر عبد المنعم عن رغبته في العودة مرة أخرى لتقديم البرامج التلفزيونية، قائلًا: نفسي أرجع لكرسي المذيه تاني، ولكن هرجع أقول الحق اللي ينفع بلدي، وأكيد مش هطلع أقول ادبحوا حمير لأن أبو حنيفة قال عليهم كويين أوي، وأكيد هكون في صف الناس والمذيع لازم يكون في صف الناس، والمذيع لازم يكون له وجهة نظر، آه الإعلام لازم يكون حيادي لكن دا في الخبر، لكن المذيع اللي له برنامج لازم يكون له وجهة نظر ويدافع عنها.

واختتم تامر عبد المنعم حديثه: الشاعر سنوميدس دا شاعر إغريقي قال هزمناهم ليس حين غزوناهم، وإنما هزمناهم حين انسيناهم تاريخهم وحضارتهم، الجملة دي أثرت فيا جدًا من سنين، واعرفي تاريخك وحضارتك قبل ما تطلعي تٌطرشي الطراش اللي بنشوفه في 85% من البرامج للأسف.

https://fb.watch/juW8AHRObN/?mibextid=qC1gEa