كتبت : ريم خالد
نعى يوسف مصيلحي، ابن الفنان الراحل أشرف مصيلحي بكلمات مؤثرة بعد رحيله وقام بنشر صور تجمعهم سويًا .
وشارك يوسف مصيلحي ، مجموعة صور تجمعه بوالده الراحل اشرف مصيلحي عبر حسابه الشخصي على موقع التواصل الاجتماعي ” انستجرام ،” قائلًا: “الله يرحمك يا أطيب وأجدع وأحن أب في الدنيا وكان نفسي تكون موجود وشايف حب الناس وروحك الحلوة الموجودة في كل حد فينا”.
وأكمل يوسف أشرف مصيلحي : “تشوف الناس كلها بتقول عليك إيه من أصغر واحد لحد أكبر واحد ، وأنا فعلًا مش فاكر ولو مرة واحدة أنت عملت حاجة ضايقتني أو حتى شدينا مع بعض زي أي أب وابنه وده عشان إحنا كنا صحاب وكنت بتفهمني وعارف دماغي” .
وأضاف قائلًا: “أنا عارف أنك دلوقتي مرتاح أكتر بكتير وأكيد مبسوط وأنت شايفنا كلنا متجمعين وحاسس أكيد بكل المحبة اللي كانوا موجودين اليومين دول وهيفضلوا موجودين على طول ، ودلوقتي أنا هعرف اتكلم معاك وعارف أنك هتسمعني يمكن أكتر من آخر فترة كنت موجود وسطنا عشان كنت تعبان فا مش بعرف اتكلم معاك”.
واختتم في آخر كلامه قائلاً: “أنا عايزك تعرف إني بحبك أوي وهفضل شايل اسمك وأنا فخور إنك أبويا لحد لما أجيلك إن شاء الله.. بجد بحبك أوي يا بابا وعارف أنك أكيد في الجنة إن شاء الله”.
الجدير بالذكر أن أشرف مصيلحي توفي ، يوم الأحد الماضي ، بعد صراع مع المرض لمدة 3 سنوات ، وحدث مضاعفات أدت إلى تدهور حالته الصحية ورحل تاركًا حزنًا كبيرًا في قلوبنا .
وكانت بداية ظهور أشرف مصيلحي في السينما عام 2000، حيث شارك في فيلم “بونو بونو” بطولة النجمة نادية الجندي، وكثرت مشاركته في السينما في الكثير من أعماله منها، الأبواب المغلقة، راندفو، جواز بقرار جمهورى، أسرار البنات، سحر العيون، أول مرة تحب يا قلب، خالتى فرنسا، تيتو، الحياة منتهى اللذة، وش اجرام، العيال هربت، الجزيرة، شارع 18، السفاح، وكانت اخر أفلامه هو فيلم “هروب مفاجئ” من بطولته عام 2017.
