مايا أحمد لكلاسي: أطلقت مبادرة أوعى ليغفلونا بسبب الاستغلال

حوار: سلمى عبد الله

تصوير :مايكل إحسان

مايا أحمد هي أخصائية تجميل معتمدة دوليا كأخصائية تجميل شبه دائم، أطلقت حملة لتجميل مريضات السرطان وأخرى بعنوان “أوعى ليغفلونا”.

وأجرت أخصائية التجميل مايا أحمد حوارا مميزا وشيقا مع مجلة “كلاسي” لكل فتاة تبحث عن جمالها بدون تدخلات جراحية.

ما هي مبادرة السرطان؟

بدأت هذه المبادرة من سنتين وقررت تكون مجانية لغير القادرات من مريضات السرطان، لإن مرض السرطان بيعتمد دائما على النفسية، النفسية لو سيئة بتأثر على المناعة والمرض بيهاجم، فأنا حبيت أقف بجانبهم  ولو بجزء بسيطة، لو الحواجب أو الرموش وقعت فأقدر أعمل لها مايكروبليدنج أو أركب لها رموش  من أجل مساعدة نفسيتها على التحسن فبالتالي مناعتها تفرق في المرض.

مبادرة “أوعى ليغفلونا” هي الثانية لمايا أحمد على السوشيال ميديا، كيف جاءت لك الفكرة وماهي آليات تنفيذها ؟

بدأت هذه المبادرة من قريب لأن هناك أشخاص في المجال بتستغل البنات والسيدات بطريقة خاطئة وأيضا يوجد مغلوطات كثيرة جدا ويطلقون عليها مسميات وتنتج عنها مشاكل كبيرة.

وبدأت هذة المبادرة من خلال صديقة لي  كان لديها مشكلة تاتو قديم، تقوم  بإزالة منذ أكثر من سنة وصرفت  الكثير من الأموال ، وظلت فترة كبيرة بعد الإزالة ثم عملت مايكروبليدنج جديد، وكان يجب ان يكون سطحي ولكن ماتم عمله كان  بالماكنة من أول وجديد فكانت النتيجة رجوع التاتو مرة أخرى، المايكروبليدنج محتاج إزالة التاتو القديم نهائيا.

الكثير بيشتغل بماكنة التاتو، ولكن طبعا هناك فرق بين المايكروبليدنج والتاتو، دايما بيضحكوا على الناس وبيشتغلوا بالماكنة على أساس إنه مايكروبليدنج، لا هناك فرق.

ومن هنا جاءت فكرة مبادرة “أوعى ليغفلونا”، هناك فرق بين ماكنة التاتو بالكهرباء أو حتى بدون سلك ومشرط المايكروبليدنج اللي هو السطح.

كيف يمكن ان   أختار الخبير التجميل الصحيح لي ؟

رقم واحد ممنوع الاسترخاص نهائيا، هناك أشياء مينفعش استرخص فيها زي الوجه، (الوش مفهوش معلش).

مينفعش أروح لأي حد يعمل لي حواجبي أو حتى شفايفي بسعر رخيص، الحبر والأبرة والتعقيم بكام؟ كل هذا صعب جدا ومكلف، الحاجة الأوريجينال المستوردة سعرها 3 أضعاف، فمينفعش أعملك حواجبك بـ400 أو 500 جنيه.

هذه الأحبار بتكون صيني أو كوبي وكلها رصاص وبتحول لون الحواجب لأزرق وأخضر ورمادي، والإزالة تكلفتها حوالي 10 أو 20 ألف جنيه.

لازم أختار حد عنده ضمير ويكون محل ثقة وأشاهد ردود الأفعال عليه.

ما هي تقنية الكاموفلاج وبتستخدميها لمين؟

ج/ هي عملية إخفاء عيوب البشرة بمواد تمويهية تكاد تكون طبيعية لا تحتوي على تاتو أحبار نهائيا.

زمان كانت الناس بتستخدم اسم “كاموفلاج” للإخفاء بالتاتو البيج، وطبعا هذا كارثة، ولكنها عندما ظهرت كانت تستخدم كتاتو بيج لتصليح الحواجب والشفايف وبيكون شكلها سئ وإزالتها صعبة جدا.

بستخدم الكاموفلاج في توحيد أو تفتيح لون البشرة حسب العيب، بعالج بيها مشاكل تستمر لسنين، مثل الكلف والبهاق والتصبغات وأثار العمليات الجراحية والهلات وتفتيح منطقة الأندر آرم والبكيني والحروق.

ولكن أي منطقة بها حروق أو كدمات بشتغل عليها الأول بتكنيك يسمى “السيروم المعالج”، أقدر أفرد الجلد المكرمش وأملى الندبات بهيالورونيك أسيد، وبعد جلسة الترميم أقدر اشتغل بالكاموفلاج.

موانع الكاموفلاج.. مقدرش اشتغل على أي حاجة نشطة تماما، بمعنى بهاق متغير مثلا؛ لأنها تستعطي نتيجة عكسية.

ما هي أصعب حالة مريتي بيها؟

ج/ الحروق طبعا صعبة، لأن هناك مناطق بتكون طبقة الجلد رقيقة جدا، فبالتالي لازم أعمل حساب ده أثناء الشغل.

وأيضا العمليات الجراحية، يوجد جروح صعبة جدا، مثل شخص يملك 2 سرة، فلازم أختار المناسبة لمقاس الخصر وأخفي واحدة وأترك الثانية طبيعية.

يعني تقريبا الحالات كلها بتكون صعبة.

وجهي نصيحة لرغبة الفتيات صغار السن في تجربة التاتو أو غيره؟

ج/ أولا مبشتغلش حاجة نهائي قبل سن البلوغ، يعني ممكن الأم تعمل مايكروبليدنج ومعاها بنوتة عندها 16 أو 17 سنة باخدها أتكلم معاها بدل ما تروح لشخص آخر وبفهمها إن هذا ليس لسنها وأن العمر أمامها  ولو حطت نفسها من دلوقتي في إطار التاتو في مناطق معينة فالبتالي  هتضطر  وجودها في هذا النطاق طول العمر .

وبقول لها ممكن نصبر سنتين أو تلاتة وتفكيرنا هيتغير مع مرور الوقت وهعملك مايكروبليدنج لإنه بياخد وقته ويروح غير التاتو، هنغير الشكل أو نكبر ونرفع وهكذا.

ولكن بشتغل لو هي عندها حالة مرضية تستدعي، مثل الثعلبة أو حادثة تسببت في جرح في نص الحاجب، لو هي عندها 18 أو 17 سنة بقدر أشتغل عشان هتفرق معاها نفسيا.

وأختتمت أخصائية التجميل مايا أحمد حوارها مع مجلة “كلاسي” بتقديم بعض النصائح للحفاظ على البشرة في سن صغير: “الاهتمام بالبشرة ضروري حتى لا أحتاج للأصعب، روتين البشرة مناسب جدا، ويجب علي كل فتاة   تكون عارفة نوع بشرتها من أجل نوع الغسول المناسب للبشرة وتستخدم تونر ومرطب، لو البشرة دهنية لازم الجيل يكون خفيف ولو جافة لازم ترطيب والصن بلوك لأن أشعة الشمس من الممكن أن تسبب سرطان الجلد وهكذا من باب النضافة الشخصية ويحمي من البوتكس في سن صغير، وهذا ينطبق على الذكور أيضا”.