كتبت: سلمى عبد الله
علق كريم فؤاد لاعب النادي الأهلي على إصابته بقطع في الرباط الصليبي، حسبما أعلن فريقه منذ قليل.
وتعرض كريم فؤاد للإصابة في الدقيقة 12 من مباراة الأهلي وسموحة يوم مساء الخميس الماضي، وأجرى مارسيل كولر المدير الفني للفريق حينها تبديلا اضطراريا بخروج اللاعب ودخول محمد هاني بدلا منه.
وتعتبر هذه هي المرة الثانية التي يصاب فيها كريم فؤاد بقطع في الرباط الصليبي، بعدما تعرض لنفس الإصابة الموسم الماضي.
وكتب كريم فؤاد عبر حسابه الرسمي على موقع التواصل الاجتماعي “فيسبوك”: “كل خسارة دُونَ الجنة، فهي دُون”.
وأضاف: “اللهم لك الحمد كما ينبغي لجلال وجهك وعظيم سلطانك، الدنيا دار ابتلاء وشقاء ودايما الابتلاء بيجي للشخص في الحاجة اللي هو بيحبها ونفسه فيها وطموحه وسعادته فيها، وده بيكون اختبار ليك هتعمل إيه في الموقف ه، وإن الاختبار والبلاء ده بيكون ليه أجر كبير ورفع درجات في الجنة وتكفير ذنوب وحاجات كتير عظيمة أوي مقابل إني أصبر على الابتلاء ده”.
وتابع: “وأنا كان مكتوبلي إصابة في الرباط الصليبي للمرة التانية، بس عندي إحساس تاني خالص مع الاختبار ده، إنه أنا في نعمة كبيرة أوي وإن الحمد لله ربنا رزقني باختبار سهل وهين أوي مقابل ابتلاءات ناس تانية أصعب من ده بكتير، وكمان اختبار مش جديد عليا بعيده للمرة التانية في وقت قصير فهعرف أتعامل معاه بشكل كويس ويمكن أحسن”.
وواصل: “عشان كده بحمد ربنا إن الابتلاء اللي هاخد عليه أجر كبير وعظيم مش بالصعوبة القاسية اللي توجعني وتهدني”.
وأكد: “أنا بحمد ربنا، وراضي ومؤمن جدا إن ربنا بيحبنا نقرب منه بالعبادات اللي منها الصبر والدعاء”.
واختتم: “الحمد لله مستعد للاختبار ومتحمس، شوية وقت وهنرجع نحارب من تاني، أشوفكم على خير قريب”.
https://www.facebook.com/share/p/vwerCrbGZcAnzE8B/?mibextid=oFDknk
وخاض كريم فؤاد 39 مباراة مع الأهلي خلال الموسم الجاري، وسجل خلالهم 3 أهداف وصنع 4 آخرين.
وتوج الأهلي بطلا للدوري المصري للمرة الـ44 في تاريخه والثانية على التوالي بعدما فاز على سموحة بنتيجة 1-0 خلال الجولة الـ24 المؤجلة من منافسات البطولة.
ويتصدر الأهلي جدول ترتيب الدوري برصيد 81 نقطة من 31 مباراة، حيث فاز بلقب البطولة قبل 3 جولات من نهايتها.
