بكاء ابنة صلاح عبد الله بعد نعتها بأبناء العاملين: بدق البيبان من تانية جامعة

كتبت: هانيا محسن

دخلت الإعلامية دنيا صلاح ابنة الفنان صلاح عبد الله في حالة من البكاء؛ بسبب تعليق من أحد متابعيها وصفها خلاله بـ”أبناء العاملين”، في إشارة منه إلى أنها تعمل في الوسط الإعلامي نظرا لمكانة والدها الفنية.

وظهرت دنيا صلاح عبد الله تبكي في مقطع فيديو عبر حسابها الشخصي بموقع تبادل الصور والفيديوهات “انستجرام”، وقالت: الأخ اللطيف اللي كتبلي تعليق أبناء عاملين، أنا كده كده من كذا سنة تصالحت مع النوعية دي من التعليقات وبقيت بكبر دماغي كأني مشفتهاش، ولكن أنت جايلي في وقت أنا بالفعل كأبناء عاملين مضغوطة أوي فاتضايقت”.

وأضافت ابنة صلاح عبد الله: “اللي أقولهولك يا رب تبقى في مكاني، وتمر بكل الحاجات اللي أنا مريت بيها وتعيش كل الحاجات اللي أنا عيشتها وتقابل كل المواقف الصعبة اللي أنا عديت بيها، ومش هكمل كلامي أنا أصلا غلطانة أني رديت، مفيش حد في الدنيا يستاهل أني أبرر له أي حاجة، أنا بشتغل من تانية جامعة، وبسعى وبجتهد وبذاكر وبدق البيبان وبعمل كل حاجة علشان أبقى راضية عن نفسي”.