عريس كفر الدوار: أنا اتبهدلت وزعلان من نفسي أوي.. وخطيبته: سيبونا في حالنا

في أول ظهور إعلامي له، استضافت الفنانة والإعلامية لقاء سويدان عريس كفر الدوار الذي تصدر التريند في الفترة الأخيرة بعد نشر فيديو له أثناء ذهابه للكوافير لأخذ عروسته للاحتفال بخطبتهم.

وقال محمد من خلال برنامج “لقاء على الهواء” المذاع عبر قناة “الشمس”:” أنا اتبهدلت، وحياتي اتبهدلت، أنا أول مرة أدخل كوافير ومعرفش يعني إيه تريند أصلا”.

وتابع باكيا: “أنا والعروسة قصة حب وكانت بتفضل تبص عليا من الشباك، إزاي الناس تقول إنها مغصوبة عليا”.

وأكمل: “أنا تعبان نفسيا جدا من وقت الشبكة، أنا ولا بقيت بشتغل ولا حتى قادر أبص في عين أبويا”.

وأكمل: “البلد مقلوبة علينا، الناس بتتمر عليا عشان كنت ببوس أيد خطيبتي وبحاول أرضيها”.

وأوضح: “هعمل إيه، الفلوس اللي معايا خلصت ومكنش معايا فلوس أجيب بدلة وبوكية ورد، أنا اشتريت قميص بـ175 جنيه ودفعتلها 1500 جنيه للكوافير والفستان، ومكنش في مقدرتي أعمل أكتر من كده”.

واختتم: “أنا مش هسيب حقي من عم صبري صاحب الكوافير، أنا مقولتش له صور، أنا هاخد حقي بالقانون”.

وتواصلت لقاء أيضا خلال الحلقة مع خطيبة محمد عريس كفر الدوار، إذ قالت في مداخلة هاتفية خلال البرنامج: “أنا بحبه وكل الكلام اللي قاله صح، أنا بس عاوزة أقول للناس سيبونا في حالنا وياريت كل واحد يخليه في حاله”.