نشرت الفنانة راندا البحيري بيانا رسميا تستغيث فيه بنقابة المهن التمثيلية
وجاء نص البيان الذي أصدرته عبر حسابها الرسمي على موقع التواصل الاجتماعي “فيسبوك” كالآتي:
الشركة المتحدة للخدمات الإعلامية.. السيد نقيب المهن التمثيلية تحية طيبة وبعد.. هذا ليس بيان شجب ولا شكوى ولا أي شئ آخر.. كل ما في الأمر عرض موضوعي على حضراتكم.
لقد حوربت بداخل شركات الإنتاج المصرية وتم منعي من العمل بدون إبداء أسباب وبالفعل بعد أكتر من بروفه لأكتر من عمل وأكتر من محاولات لدخولي أعمال فنية (بلاقي نفسي فجأة اتشالت منها ومش فيها والعمل بيكمل من غيري).
الكلام ده بيحصل بالظبط بقاله أكتر من 7 سنوات وبيحاولوا فيه بقالهم أكثر من 13 سنة بمساعدة أحد الأشخاص خارج المجال الفني.
وليس هذا صلب الموضوع أبدا..
أنا بتعرض بقالي أربع سنين دلوقتي لضغط لا يمكن لواحدة ست تقدر تتحمله لوحدها.
أنا مشتكتش ولا خليت شكل الفن والفنانين وحش والتزمت الصمت، وبقالي سنين بحاول اشتغل في مشاريع وفيه منها اللي ربنا كرمني فيه وفيه منه اللي علشان عدم خبرتي الكبيرة آنذاك اتنصب عليا فيه.
يعني بسبب أن مفيش عدل في المنظومة اتنصب عليا في فلوس كنت شغالة بيها وجايباها بتعب كبير جدا.
كنت طول عمري شخص ماشي صح جدا فيما يخص الأوراق وحق الدولة وضرائبي كلها مدفوعة من 2004، يعني بقالي 20 سنة بدفع للضرائب.
وأظن لو أنا شخص مش ماشي صح مع الضرائب كان من زمان هتلاقي حد قال راندا مدفعتش أو معملتش أو كذا وكذا.
و محدش أصلا يقدر يشكك في حبي لبلدي الشديد ووطنيتي وفي نزاهتي، الحمد لله رب العالمين.
اكتشفت من فترة إنهم حاطين عليا ضرائب جزافية بالرغم من إني مبشتغلش في التمثيل أصلا.
وكل ما أكلم حد في المبني بيقولي أصل الممثلين كلهم حصل معاهم كده مش أنتِ بس!!!
طب أنا بتكلم عن نفسي
اتكلمت مرة واتنين
وكلمت نقيبي السيد أشرف ذكي، وهو أداني نمرة تليفون الأستاذة مها المختصة عن الممثلين أمام الهيئة العامة للضرائب بحيث إنها تفهمهم وقالي إن الموضوع ده هيخلص؛ لإن الممثلة دي حاليا لا تعمل بالتمثيل، فمش هينفع إننا ندفعها فلوس قديمة هي أصلا دفعتها قبل كده، وبالمستندات أحنا (أنا والمحاسب الضريبي المحترم اللي شغال معايا) دفعنا الفلوس اللي علينا من قبل 2005، كل سنة بندفعها في سنتها.
إنما هممرة واحدة.. عايزينك تدفع ضرائب جزافية هم اللي حسبوها من غير ما يرجعولك.
واضطريت في المره الأولى نظرا لحبي لبلدي واحترامي لكيان الفنان المصري وعدم اهتزاز صورته أمام المصريين والعرب إني أمضي على رقم كبير جدا مع إني متأكدة إن أنا مش المفروض ادفع الكلام ده.
على وعد منهم (السيد عمرو حجازي والسيد أحمد عبد الغني) إني هدفع أصل المبلغ ومش هدفع غرامات على المبلغ ده.
وبالفعل وقفوا غرامات وبقالي كذا سنة بقسط المبلغ ده للضرائب لحد الحمد لله ما خلصته كله.
فوجئت بعد ما المبلغ خلص أولا بمبنى القيمة المضافة بيكلمني عايز يدفعني غرامة بالرغم من إنهم وعدوني مفيش غرامات.. والغرامة دي أكتر من المبلغ نفسه اللي بقسطه بقالي سنتين، ثم اتصال من كذا مأمور (ضرائب عامة) طالبين مني فحص كل سنين العمل اللي اشتغلتها.
أفحص 2006 اللي ورقها بقى لونه أصفر؟؟؟؟؟
وطالبين إني أدفع من 2006 لحد 2024 يعني 18 سنة ضرايب أنا دافعاهم أصلا قبل كده.
قولتلهم أنا دفعت ده، قالولي مينفعش، قولتلهم إيه هو اللي مينفعش، قالولي أصل أحنا واخدين تعليمات إن كل الممثلين يدفعوا أزيد من اللي دفعوه، قولتلهم التعليمات دي منين؟؟ محدش رد، قالولي كده كده هتدفعي حتى لو دفعتي قبل كده.
مع الضغط عليّ..
اضطريت إني أعمل جلسات مع الضرايب لحد ما كل الناس هناك بقوا يشوفوني يوميا، وبجد في ناس تعاطفت جدا مع موضوعي؛ لأنهم بالفعل شايفينني دفعت قبل كده.
إلا مختصة الحجز كل يوم بتكلمني (أنا هحجز عليكي).
أنا أول مرة أشوف موظف بيتصل بعميل الساعة 8 بالليل بعد مواعيد العمل؛ علشان يقوله أنا هحجز عليك.
يتم تهديدي يوميا بالحجز على أموالي.
يتم تهديدي يوميا بالضرايب مع إني دفعت كل ضرائبي لحد آخر عمل عملته.
يتم تهديدي يوميا بالضرايب مع إني لا أعمل مع المتحدة ولا غيرها.
السيد نقيب المهن التمثيلية
الساده المسئولين عن الإنتاج في مصر
ارحموا الممثل المصري
ارحمونا
وبجد بجد والله ما بطلب شغل أنا أصلا فقدت الشغف كممثله ومش عايزه أشوف وش الكاميرا دي تاني.
أنا فعلا كل اللي طالباه إنكم تسيبوني في حالي، بس مش أكتر.
يا أسيادنا أنا عايزة أكمل حياتي في مصر
مش عايزه أدور على شغل برا
ولا عايزة أعيش في حتة تانية ليه مصممين تزقونا كلنا ندور علة حياتنا في حتة تانية
أنا قاعدة هنا.
