كتبت:مي شاهين
حل الفنان حسن الرداد ضيفًا على برنامج “صاحبة السعادة” التي تقدمه الإعلامية والفنانة إسعاد يونس، ويعرض على قناة Dmc.
وتحدث حسن خلال الحلقة عن فقدانه لوالدته حيث قال :”الناس إلي عاشرت أمي عندهم أمي مميزة جدًا، عمرها مازعلتني في حاجة، وهي منبع الطيبة والكرم وست مجاملة بشكل كبير وعلطول تبعت للحبايب حاجات إلي مشهورة في دمياط، كانت ست معطاءة وفيضان حب وياما إستحملت علشاني، هي إلي خلتني أمثل ووقفت جمبي في وفاة أبويا وأخويا لأني كنت منهار”.
وتابع:”الموت مش كله زي بعضه الموت الفجأة غير الموت إلي متحضرله غير وأنت صغير أو كبير لكنه مؤلم، أنا روحي في أمي، طول عمري مؤمن إن أهم حاجة في الحياة هي العيلة بعد كدا أي حاجة تانية، يعني كنت بقعد مع أمي ومش بقعد مع صحابي، وكنت متعلق بيها”.
وأضاف :” أمي كانت صغيرة وروحها مش بتكبر، كانت صديقة لذيذة ودمها خفيف أمشي أرقص في البيت ترقص معايا، وفي نفس الوقت هي صوت العقل وزيادة عليا في حتة التواضع، مرة كنت صغير وبحوش فأنا ساعتها حوشت 2000 جنية، وأول مخدت الفلوس بعد ربع ساعة خلصوا، اللي استلف وحاجة في بيت مثلا، فقلت لي الواحد حظه كدا قالي أحمد ربنا إن الناس لما طلبت منك فلوس كان معاك فلوس”.
وأكمل حديثة قائلاً:” تعلمت منها الرضا، وأنا بحب الشغلانة دي وداخلها علشان بحبها مش علشان أبقى مشهور لأن عيلتي كانت مشهورة في دمياط فكنت نجم في بلدي، عشقت السينما وشوفت ممثلين اتوفوا قبل ماأتولد فأشوف أعمالهم واحبهم فالموضوع دا كان عجبني”.
وإختتم كلامه قائلاً:” أنا عندي حالة من حالات الإنكار 100% لما بتيجي سيرة أمي بقول ماما ربنا يديها الصحة، ومبحبش أقول الكلام دا علشان محدش يقول دا دينيا غلط بس أنا مش بتعامل مع الموضوع على أنه حقيقة، لما بعمل حاجة لأمي بعملها كدا مثلا اتبرع بحاجة أعملها صدقات كتير بس أقل بكتير من إلي مفروض أعملهولها لأني مش مقتنع ولا هقتنع إن الموضوع دا حصل، أنا عارف طبعا إن الموت علينا حق ، بس أنا بعد موت والدي وأخويا كنت ممسوك بحاجة واحدة بس فالحاجة دي إتقطعت فأنا دلوقتي بجري لحد ما الواحد يوصل لنهاية عمره ومش هفكر”.
