“مش هيكون جواك حلم بحاجة الا و ربنا جاعل جواك القدرة على تحقيقه”.. تامر حسني يوجه رسالة لجمهوره
كتبت:مي شاهين
ووجه الفنان تامر حسني رسالة تحفيزية لجمهوره عبر صفحته على موقع التواصل الاجتماعي الشهير “فيس بوك”.
حيث قال:”فجر جميل و كله بركات ان شاء الله للجميع ….. لفت نظري في تعليقاتكم ان في ناس كتير مش عارفين يوصلوا و ينجحوا و حاسين ان كل شيء سيء ملازمهم و فاكرين انهم منحوسين و مصدقين ان حظهم وحش عشان مفيش اي نجاح بيحققوه و مش عارفين السبب انا هشاور على سبب مهم و خطير من قرائتي كتير في اللي هقوله دلوقتي … طبعاً هقول سبب غير الاسباب المعروفه زي لو علاقتك سيئه بربنا او بوالديك و اهلك ،،،هقول سبب ممكن يكون مش في دماغ كتير مننا “.
وتابع:” كتير من صدمات حياتك سواء ليك ذنب فيها او ملكش ذنب فيها او لو ناس خذلوك او كسروك لو ناس مش كويسه نجحوا و انت شخص كويس و معرفتش تنجح. ركز في اللي جاي …((عقلك الباطن )) ممكن يبقى هو السبب ،،،، يعني انت السبب ورا كل ده عشان عقلك الباطن بعد الصدمات و بعد كل جرح خزن معاني غلط و اقنعك بيها انها صح زي انك شخص قليل متسواش و ملكش قيمة”.
وأضاف :” و خزن ان الطيبه مش كويسه ولازم تبقى شرير عشان تعرف تعيش ، خزن ان الناس اللي غلط ربنا اداهم و خدوا حقهم و المجتهد و المحترم مبياخدش حقه و الافكار الغلط اللي اتسجلت دي عمال يطلع منها كل سلوكياتك الوحشه اللي بتجذبلك كل الوحش و تلاقي نفسك محبوس مابين الغلط اللي جواك و الغلط اللي بتخرجه براك و كمان انت مئذي منه انت واللي بتتعامل معاهم فا بتنجح في صنع طاقات سلبيه رهيبه حواليك تزيدك في هدم نفسك تخيل كل ده وانت مش عارف انك انت السبب “.
وأكمل :” ،ةعقلك الباطن بيخليك تصدق نتايج صدماتك اكتر من وعود ربنا .. (( الحل)) انك لازم تتعامل مع مخك انه جهاز هتفتحه و ترمي منه كل المعاني البايظه و مش بس ترميها ده انتا هتبدلها بالمعاني الصحيحه اللي ربنا قال عليها زي انا هحب الخير لغيري من قلبي انا مش هتكلم على حد في ظهره انا مش هيأس انا هقدر انا هوصل عشان ناس كتير غيري قدروا و وصلوا ،، انا مش هفتكر الماضي و لو افتكرته هقول كتر خيره علمني حاجات كتير حتى لو فهمتها بعد فتره ،، و في حاجات بعينها لازم تصلحها بجد بجد بجد “.
وأستطرد:” ثقتك في الله مهما يحصل و تبقى قد اختباراته و تسلم لقضاءه ثقتك في نفسك و احترامك و تقديرك لشخصك و انك مش قليل تتمسك بالمبادئ مهما تشوف ناس ماشيه غلط و بتنجح تعرف ان كل بني آدم و له اختباراته الشخصيه الخاصه به هو و ربه فتخليك في اختباراتك انت ركز في قصتك انت مع ربنا يعني بلغة الامتحانات تخليك في ورقتك عشان في الآخره انت هتتسأل في ورقتك انت مش في ورقة غيرك “.
واختتم حديثه قائلاً:” متتعقدش فا تخلي اللي هتعرفهم بعد كده يدفعوا ثمن ذنب جراحك و شكوكك و صدماتك القديمه،، و تبدأ صفحه جديده بيضاء مع نفسك في كل اتجاهات حياتك و كأنك بدلت مخك بمخ جديد نضيف نشيط متزن واعي و باذن الله هتعرف تشوف الحياه بطريقه جديده جميله و عايز اقول حاجه ممكن تطمن كل اللي بيحلموا و عندهم هدف نفسهم يحققوه مش هيكون جواك حلم بحاجه الا و ربنا جاعل جواك القدره على تحقيقه “.
