كشف الفنان حازم إيهاب تفاصيل شخصيته في مسلسل “إنترفيو” الذي يلعب بطولته مع الفنانة رنا رئيس وخالد شباط، مشيرا إلى أن مشاهد الأكشن أصعب ما واجهه خلال المسلسل، وستضح ملامح الأحداث المثيرة حلقة تلو الأخرى لمعرفة ما تخفيه شخصية.
وقال حازم خلال لقائه في برنامج “It’s Showtime” التي تقدمة الإعلاميتين دينا حويدق وسمر نعيم على شاشة قناة “الحياة”: “المسلسل خلصان بقاله كتير أوي، في شهر 10 السنة اللي فاتت، وبدأنا تحضيرات من قبلها على طول وكلمني المخرج أحمد خالد أمين وقرأت الورق وحسيت إني عمري ما عملت دور زي ده قبل كده، دور مليان مشاهد فيها أكشن وفرهدة، وحسيت إن شاهين بيملك مفتاح في المسلسل، وهو الكائن الغامض ووراه حاجة لازم نفهمها”.
وأضاف: “ومعظم الأدوار اللي اشتغلتها قبل كده كان فيها لايت كوميدي، وبطلع أهزر وروش وشاهين عكس كده تماما”.
أما عن الصعاب التي واجهها حازم خلال التصوير، قال: “كنا بنصور في صحراء والمايه والمطر، كنا بنغرز وبنقع وعمال يتفاقم مننا ومش عارفين نلمه، وفي زوايا لازم تتاخد وكنا بنعيد كتير، وكان الجو برد جدا وبترعش وعمالين يغطوني بـ70 حاجة ورا بعض، وطلعت بخبرة كبيرة من العمل ده، وطلعت من العمل عارف إني ممكن أعمل أكشن في يوم من الأيام، وحبيت الأكشن”.
وأردف مازحا: “متهيألي أحمد السقا أو أحمد العوضي محتاجين يقلقوا شوية لأني داخل السوق بقوة جدا، وطبعا بهزر، دول أخواتي”.
كما أشاد حازم بتعاونه مع منصة “Watch it”، قائلا: “الطريقة اللي بتشتغل بيها Watch it خرجت أجيال جديدة، عندنا دلوقتي عصام عمر وطه دسوقي ونور النبوي ومحمد الشرنوبي، ولو كنا من سنتين تلاتة لو قولنا لمنتج نعمل مسلسل من بطولة عصام عمر كان حد هيعمله؟ لا مستحيل، لأن ثقافتنا كانت معتمدة على نجم يبيعوا باسمه العمل”.
