وكتبت نشوى مصطفى كلمات مؤثرة لزوجها عبر صفحتها الرسمية علي صفحتها الرسمية على موقع التواصل الاجتماعى قائلة: “سترتني ربنا يسترك.. أكرمتني ربنا يكرمك.. سيبت لي أجمل هدية ولادنا ربنا يهاديك بالفردوس الأعلى، 33 سنة ستر وكرم ومحبة ومودة ورحمة، علمتني إزاي أكون من المتصدقين، علمتني إزاي أكون دايمًا في معية الله، علمتني إزاي تكون عزة النفس، علمتني إزاي اتسامح حتى مع اللي أذاني، علمتني إزاي أتوكل على الله في كل شئوني، علمتني إزاي أكرم ضيفي”.
https://www.facebook.com/photo?fbid=10164567456414992&set=a.10151191857909992
وأضافت: “علمتني معنى التواضع مع عباد الله الضعفاء، يا نبيل الأخلاق يا ابن الأصل العالي، نسيت تعلمنى ازاي أقدر أعيش من غير وجودك، 33 سنة مبعدناش عن بعض لحظة، 33 سنة ذكريات وحياة بحلوها ومرها، 33 سنة كنت خير زوج وخير أب، 33 سنة أكرمتني وسترتني وجبرت خاطري وربيت عيالنا احسن تربية”.
وتابعت : “ليه يا عماد سبتني لوحدي كده، ما استاهلش منك تسيبني لوحدي ده أنا مبعرفش أعمل حاجة في الدنيا، أنت اللي كنت بتعمل لنا كل حاجة، أنت اللي سندتني في كل ظروف حياتي الصعبة، في شدتي وفي مرضي شيلتني وطبطبت عليا”.
واختتمت رسالتها: “ياه على غلاوتك ياعشرة عمري، ياه على غلاوتك يا أبويا وأخويا وحبيبى وجوزي وابني، باموت ياعماد، باموت وأنت مش قدام عيني، هكمل إزاي يارب من غيره، ادعو له بالرحمة وادعولى بالصبر وادعو لولادى بالصبر والثبات”.
