تامر حسني الأكثر إيرادات في تاريخ السينما العربية بفيلم بحبك ويوجه الشكر للجمهور

كتبت: مريم عوض

وجه الفنان “تامر حسني” رسالة شكر إلى جمهوره وكل من دعمه خلال سنة ٢٠٢٢، وذلك شارك “تامر حسني” منشوراً من خلال حسابه الرسمي بموقع تبادل الصور والفيديوهات الشهير “الإنستجرام”، وأرفق بتعليق قائلاً: “مع نهاية السنة دي و بداية سنة جديدة أحب أقولكم إني بشكركم جداً على إستقبالكم و حبكم و تفاعلكم مع أعمالي في السنة دي من ألبوم لأغاني فيلمي لفيلم  بحبك”.

وتابع: “هبدأ السنة الجاية معاكم بتشجيعي ليكم من خلال تجربتي الشخصية في أكبر تحدي فني عملته في حياتي في فيلم بحبك اللي أثبتت فعلاً أن مفيش مستحيل بقولكم الكلام ده عشان كلكم على بداية السنة تقولوا مفيش مستحيل و تأخدوا قرار حاسم بلا راجعة للنجاح أو التغيير أو التطوير أو الإصلاح  قرار تمراوي حسناوي و دا القرار اللي أخدته و أنا شغال في فيلم بحبك”.

وأكد: “الكل قالي مستحيل هتنجح لو ألفت الفيلم و عملت موسيقته التصويرية و كنت بطله و تغني أغانيه و تلحن منها و تكتب منها و تخرجه كمان و بعد إصدار الفيلم طلعوا حملات يحاربوني منهم حملات مأجورة لمصلحة ناس ضعيفة نفوس و حملات من باب الغيرة و عدم التصديق أن في شخص ممكن يجمع كل دول و ينجح فكانوا بيحاربوني على سبيل الإحتياط”.

وأوضح: “رايحين يشوفوا الفيلم محضرين هيغلطوا فيا يقولوا إيه و كلهم حتى كلامهم واحد زي ما يكون في حد كتبلهم ورقه يقروا منها يعني حتى بلا شخصية و في ناس محترمة غلطة و إعتذرت و في ناس غيرهم كانوا حياديين طبعاً ليهم الشكر
بقول كل دا عشان تعرفوا أن لو كل الناس إتجمعت عشان توقفلك رزقك أو نجاحك مستحيل حاجة تحصل غير اللي ربنا كاتبه و يشاء ربنا أن الفيلم اللي أخرجته يحقق أعلى إيراد دولي لفيلم مصري في تاريخ السينما العربية و الأغنية اللي كلامي و لحني تحقق أعلى مشاهدات السنة دي  (هدلعني) رغم إن جنبها أغاني كتير حلوة مش كلامي و لحني”.

وأشار: “آدي شركة سينرجي النهاردة مشكورة لإعلانها و تفاخرها بما حققه فيلم بحبك من إيراد أول من نوعه في حق السينما المصرية و طبعاً ده حصل بكل أبطاله حبايب قلبي
تخيلوا بقى إحساس كل حاقد دلوقتي و الفكرة إني مردتش على حد غير بشغلي و مجهودي اللي أخلصت فيه و صدقته  إنتوا كمان متسمعوش لأي حاقد”.

وأردف: “ابدأوا السنة الجديدة بقرارات جديدة متسمعوش لأي شخص محبط حقود كريه، صاحبوا الأشخاص المجتهدة اللي مليانين طاقات إيجابية، الأشخاص اللي كلامهم طيب، متصدقوش كلمة مستحيل، العصر دا الكلمة المُحبطة فيه بقت أسهل حاجة، و ممكن تقتل بني آدم جميل بس ضعيف مش عارف يتعامل مع كمية السواد اللي بقت في قلوب ناس كتير”.

وواصل: “في رحلتي شوفت حاجة غريبة جداً شوفت ناس بتلوم على المجتهد مع أن اللوم المفروض يبقى على المُقصر  عشان كدا لما المقاييس تلاقوها بقت عند بعض الناس ماشية بالعكس متسمعوش ليهم خالص مهما صوتهم كان عالي شوية و بيختفوا إعرفوا  و طمنوا نفسكم إنه ( لايصح الا الصحيح ) و قبل الكل ربنا موجود و دا كان أكبر تحدي ليا في حياتي الفنية و أخيراً أتمنى تعملوا بالنصيحة الأخوية البسيطة دي مش هتقدروا تمسكوا ألسنة الناس بس تقدروا تقفلوا ودانكم كل سنة وإنتوا محققين كل أحلامكم”.

ومن جهة أخرى، أكدت شركة سينرجي فيلمز المنتجة والموزعة للفيلم أن فيلم “بحبك” إستطاع إحتلال المركز الأول بقائمة الإيرادات بالوطن العربب، وذلك بعدما حقق الفيلم 2 مليون و500 ألف مشاهدة خارج مصر، إضافة إلى حصده إيرادات بلغت 55 مليوناً و600 ألف جنيه، وتعد هذه الأرقام الأعلى في تاريخ السينما العربية.

فيلم “بحبك” بطولة وتأليف وإخراج تامر حسني وشارك في بطولته هنا الزاهد وحمدي الميرغني ومدحت تيخة وهدى المفتي، أحمد عزمي، وتميم عبده وسمر محمد متولي، وعمرو صحصاح وعاليا راشد، شهد الشاطر، وآخرون.

وفى سياق آخر بدأ تامر حسني التحضير لفيلم جديد بعنوان “تاج” من تأليف تامر حسني وإخراج سارة وفيق في ثاني تعاون يجمع الثنائي بعد فيلم “مش أنا” الذي تم عرضه العام قبل الماضي، ومن المقرر البدء في الخطوات التنفيذية للفيلم عقب إجازات الكريسماس والأعياد.